Qızıl Zəmanət

1. Zəmanət müddəti və coğrafi ərazi

Qızıl Zəmanət məhsulun satın alındığı tarixdən etibarən 12 ay müddətində qüvvədədir. Zəmanətin başlanma və bitmə tarixi zəmanət sənədində göstərilir və "Zəmanət Yoxla" bölməsindən yoxlanıla bilər. Zəmanət yalnız Azərbaycan Respublikası ərazisində alınmış yeni və orijinal məhsullara aiddir.

2. Zəmanətin əhatə dairəsi

Zəmanət müddəti ərzində normal istifadə şəraitində yaranan aşağıdakı hallar əhatə olunur:

• Komponent və mexanizm nasazlıqları
• Texniki xarakterli nasazlıqlar

Nasazlığın zəmanət şərtlərinə uyğun olduğu təsdiqləndikdə məhsul təmir edilə və ya dəyişdirilə bilər. Təmiri və ya dəyişdirilməsi mümkün olmayan hallarda məhsulun qaytarılması və ya kompensasiya məsələsi Servis Mərkəzinin texniki rəyinə əsasən müəyyən edilir.

3. Zəmanət xidməti üçün müraciət

Müştəri nasazlıq yarandıqdan sonra 3 iş günü ərzində tərəfdaş mağazaya və ya Zəng Mərkəzinə müraciət etməlidir. Məhsul zəmanət sənədi ilə birlikdə rəsmi Servis Mərkəzinə təqdim edilir və burada texniki diaqnostika aparılır.

4. Təmir müddəti

Zəmanət çərçivəsində servisə qəbul edilmiş məhsulun təmiri, texniki baxışı və ya dəyişdirilməsi 14–30 iş günü müddətində həyata keçirilə bilər. Müddət nasazlığın xarakterindən, ehtiyat hissələrinin mövcudluğundan və texniki prosesdən asılı olaraq dəyişə bilər.

5. Təmiri və dəyişdirilməsi mümkün olmayan hallar

Nasazlığın istehsal qüsurundan qaynaqlandığı və məhsulun texniki cəhətdən təmirinin mümkün olmadığı müəyyən edilərsə, məhsul analoji məhsulla əvəz edilə bilər.

Analoji məhsulla əvəzləmə mümkün olmadıqda, məhsulun servisə təqdim edildiyi tarixdəki real bazar dəyərinin 50%-i müştəriyə ödənilə bilər; bu məbləğdən diaqnostika və servis xidmətləri üzrə 10% komissiya tutulur. Məhsulun qaytarılması və kompensasiya məbləği yalnız Servis Mərkəzinin texniki qiymətləndirməsi əsasında müəyyən edilir.

6. Zəmanətin qüvvədən düşdüyü hallar

Aşağıdakı hallarda Qızıl Zəmanət tətbiq edilmir:

• Məhsulun su və ya digər maye ilə təması nəticəsində yaranan nasazlıqlar və korroziya
• Fiziki zərbə, sındırılma, əzilmə və digər mexaniki zədələr
• Məhsulun təyinatından kənar və ya düzgün olmayan şəkildə istifadəsi
• Rəsmi Servis Mərkəzindən kənar şəxslər tərəfindən məhsulun açılması, təmiri və ya müdaxilə edilməsi
• Yanğın, qəza və digər xarici təsirlər nəticəsində yaranan zədələr
• Elektrik cərəyanının qeyri-sabitliyi və ya elektrik şəbəkəsi səbəbindən yaranan nasazlıqlar
• Məhsulun düzgün saxlanılmaması və istifadə qaydalarına əməl edilməməsi
• Proqram təminatının istifadəçi tərəfindən dəyişdirilməsi və ya zədələnməsi
• Cihazın seriya nömrəsi, plombu, stikeri və ya digər identifikasiya məlumatlarının silinməsi, dəyişdirilməsi və ya oxunmaz vəziyyətə salınması
• Məhsulun fiziki təsirə daim məruz qalan və istehlak xarakterli hissələrinin sıradan çıxması

7. Zəmanət sənədi və məhsulun təqdim edilməsi

Zəmanət xidmətindən istifadə etmək üçün müştəri məhsulu zəmanət sənədi ilə birlikdə Servis Mərkəzinə təqdim etməlidir. Zəmanət sənədi təqdim edilmədikdə və ya sənəddəki məlumatların məhsulla uyğunluğu təsdiqlənmədikdə, pulsuz zəmanət xidməti göstərilməyə bilər.

8. Zəmanət haqqı və tərəfdaş mağazaların öhdəlikləri

Qızıl Zəmanət haqqı məhsulun satış qiymətinə uyğun olaraq aşağıdakı qaydada hesablanır:

• 200 AZN-dək — 30 AZN
• 200–400 AZN — satış qiymətinin 15%-i
• 400–1,000 AZN — satış qiymətinin 10%-i
• 1,000 AZN-dən yuxarı — satış qiymətinin 7%-i

Qızıl zəmanət məbləği satış zamanı sistem tərəfindən avtomatik hesablanır.

Tərəfdaş mağaza müştəriyə Qızıl Zəmanətin şərtləri barədə düzgün məlumat verməli, zəmanət sənədini düzgün rəsmiləşdirməli və müraciət zamanı müştəriyə lazımi dəstəyi göstərməlidir.

Bu, qısa xülasədir. Hüquqi qüvvəyə malik tam mətn üçün Zəmanət Müqaviləsi səhifəsinə baxın.